Log har mod pe ruk ruk ke sambhalate kyun hain...

1) Log har mod pe ruk ruk ke sambhalate kyun hain
Itana darte hain to phir ghar se nikalate kyun hain

Main na juganu hun diya hun na koi tara hun
Raushani wale mere nam se jalate kyun hain

Nind se mera ta`alluq hi nahi barason se
Khwab a a ke meri chat pe tahalate kyun hain

Mod hota hai jawani ka sambhalane ke liye
Aur sab log yahin ake phisalate kyun hain ..

2) Kabhi akaile ma mil kar jhanjhor doon ga usse
Jahan jahan se wo toota hai jor doon ga usse

Mujhe chod gaya ye kamaal hai us ka
Iraada ma ne kiya tha ke chor doon ga usse

Paseene baant'ta phirta hai har taraf sooraj
Kabhi jo haath laga to nichor doon ga usse

Maza chakha ke hi maana hoon ma bhi dunya ko
Samajh rahi thi ke aise hi chor doon ga usse

Bacha ke rakhta hai khud ko wo mujh se shseesha badan
Usse ye dar hai ke tor phor doon ga usse ..

3)Har ek chehare ko zakhmon ka aina na kaho

Ye zindagi to hai rahamat ise saza na kaho

Na jane kaun si majaburiyon ka qaidi ho
Wo sath chor gaya hai to bewafa na kaho

Tamam shahar ne nezon pe kyun uchala mujhe
Ye ittefaq tha tum is ko hadasa na kaho

Ye aur bat ke dushman hua hai aj magar
Wo mera dost tha kal tak use bura na kaho

Hamare aib hamay ungaliyon pe ginwao
Hamari pith ke piche hamay bura na kaho

Main waqiyat ki zanjir ka nahi qayal
Mujhe bhi apane gunahon ka silsila na kaho

RAHAT INDORI